كل يوم افتتاح أو مشروع جديد، ده نظام بيطبقه الفريق كامل الوزير في وزارة النقل، واللي أثبت نجاحه وجدارته في تنفيذ المشروعات بنجاح وإنجازها بشكل كامل خلال السنين الأخيرة، عشان يتحول لتميمة نجاح الحكومة المصرية، في أي مكان يسد، وأي حاجة عايزة تخلص فبتكون كلمة السر هي “كامل الوزير”.
وفي الساعات الأخيرة، الفريق كامل شهد على توقيع عقد مشروع تمويل وتصميم وإنشاء واستغلال وصيانة الميناء الجاف والمنطقة اللوجستية بمدينة العاشر من رمضان بنظام المشاركة مع القطاع الخاص.
وهنا وزارة النقل ممثلة في الهيئة العامة للموانئ البرية والجافة، اتعاقدت مع شركة ميدلوج السويسرية، وهي الذراع اللوجستي لأكبر خط ملاحي بالعالم (MSC) ، وهتنفذ ميناء العاشر من رمضان في فترة زمنية قصيرة جدا.
ونقدر نقول إن تنفيذ المواني الجافة هو تكليف من الرئيس عبدالفتاح السيسي، عشان نقدر نحول مصر لمركز إقليمي للنقل واللوجستيات وتجارة الترانزيت، عشان كده في مخطط لإنشاء 32 ميناء جاف ومنطقة لوجستية على مستوى الجمهورية، وكمان 7 ممرات لوجستية متكاملة، عشان تربط مناطق الإنتاج الصناعي والزراعي والتعديني بالموانئ البحرية، أو تربط الموانئ البحرية على البحر الأحمر بالموانئ البحرية على البحر المتوسط.
ومش بس كده، ده من ضمن المكاسب الاقتصادية لإنشاء المواني الجافة، هي خدمة المجتمعات العمرانية الجديدة من خلال شبكة من السكة الحديدية، سواء كانت ديزل أو قطار كهربائي سريع أو شبكة الطرق الرئيسية، عشان تربط الموانئ الجافة والمناطق اللوجستية الموجودة على الممرات دي ببعضها.
وعلى سبيل المثال، الميناء الجاف والمنطقة اللوجستية اللي موجودة في العاشر من رمضان، بنعتبر أحد المكونات الرئيسية لممر ( السخنة / الإسكندرية ) اللوجيستي الدولي المتكامل.
عشان كده، في تكليفات وتوجيهات رئاسية بتعظيم التعاون مع القطاع الخاص الدولي والمحلي في كل مشروعات وزارة النقل وخاصة ميناء العاشر من رمضان اللي هيتنفذ على مساحة 250 فدان.
كمان، المينا ده هيتم تقسيمها لمنطقتين، الأولى بمساحة 130 فدان مخصصة لإنشاء الميناء الجاف، و الثانية بمساحة 120 فدان مخصصة لإنشاء المنطقة اللوجستية.
ونقدر نقول إن المشروع ده هيساهم في خدمة المنطقة الصناعية بالعاشر من رمضان وحركة التجارة، وكمان هيقلل تكدس البضائع والحاويات بالموانئ البحرية، وبالتالي هيحسن مستوى الخدمات اللوجستية المقدمة، وهيقلل تكلفة نقل البضائع وهيسهل حركة ربط أماكن التصنيع والاستهلاك ببعضها.
كل ده بجانب إنه هيخفض زمن وإجراءات عمليات الفحص والتخليص الجمركي، وهيقلل من الحوادث في الطرق، وكمان هيخلق فرص عمل جديدة للشباب.