الحكومة حاطة اعتماد كبير قوي علي قطاع السياحة علشان يكون رافد أول للدولار، علشان كده جه شريف فتحي واللي هو كانت بدايته موظف تذاكر.. ياتري اية حكاية وزير السياحة والآثار الجديد.. والدولة عايز اية من قطاع السياحة في 2025.
دول كتيرة جدا من قارة أوروبا اعتمدت في نهضة الاقتصادية علي قطاع السياحة، وعملت شوية حاجات بسيطة علشان تنشط حركة السياحة الوافدة لها، خصوصا أن السياحة عبارة عن قطاع جاهز لتوفير دولار للدول، ومش محتاج اي مصاريف غير ترويج وتجهيز المواقع اللي هيدخلها السائح خصوصا ان العائدات بتاع قطاع السياحة بتكون مباشرة وبتدخل خزينة البنك المركزي بشكل فوري مش كلاام علي ورق زي ما بيحصل في قطاع كتيرة في الدولة.
طيب اية اللي بيحصل في قطاع السياحة والأثار في 2025؟.
الدولة علي مدار السنين اللي فاتت اشتغلت بشكل فردي في قطاع الاثار وتطوير المواقع الآثرية واستغلت وجود وزير السياحة والآثار الاسبق ومرشح مصر الحالي لليونسكو علشان يطور التجربة السياحية بالمواقع الآثريةـ، خصوصا ان خالد العناني كان مرشد سياحي سابق يعني عارف كل كبيرة وصغيرة عن قطاع الأثار، وتاريخ القيمة الآثرية لكل قطعة اثرية وعارف أن تطوير التجربة السياحية في مكان آثري هتعمل اية في حركة السياحة الوافدة لمصر.
بعد رحيل خالد العناني جه الدور علي الوزير السابق أحمد عيسي واللي كان مدير في أحد البنوك، وكان الهدف من وجوده حل المشاكل اللي كانت موجودة في الاستثمار السياحي والخاصة بالحصول علي قروض من البنوك لبناء وتجهيز البنية التحتية في الفنادق والقري السياحية، خصوصا أن مصر في السنين اللي فاتت وتحديدا من سنة 2011 حصل فيها تدهور كبير جدا في تطوير وتحديث البنية التحتية للفنادق والقري السياحية، وللاسف اغلب البنوك العاملة في مصر بترفض تمول قطاعات السياحة بسبب ان القطاع ده يعتبر قطاع غير امن وبيتاثر باي تغيرات عالمية، بمعني أن حدث عالمي جايز جدا يكون مش في مصر وبعيد عن حدودنا الجغرافية بشكل كامل بس بيكون لها تاثير مباشر علي السياحة المصرية زي ما بيحصل دلوقتي في الحرب الروسية الأوكرانية واللي اثرت بشكل حاد علي الحركة السياحية الوافدة لمصر.
بعد ما أحمد عيسي أحد الدور المطلوب منه، ده الدور حاليا علي شريف فتحي واللي دوره بيختص في الترويج السياحي لمصر في الخارج وبحث سبل بيع المنتج السياحي المصري في الخارج، وزيادة الحركة السياحية الوافدة لمصر، وده اللي حصل ومصر في 2024 قدرت تكسر الرقم القياسي اللي حققته مصر في 2023 واللي وصل لـ14.9 مليون سائح، وفي 2024 مصر حققت 15.3 مليون سائح وده رقم قياسي اول مرة مصر تحققه علي مدار تاريخيها، ومصر حالبا بتستهدف بناء 40 الف غرفة فندقية جديدة لاستيعاب اعداد السائحين المستهدفين في السنين اللي جاية.