هو ايه اللي بيحصل دلوقتي في قطاع الدهب في مصر وإزاي مصر هتتحول لمركز إقليمي ودولي في إنتاج الدهب وايه تأثير دا على الاحتياطي النقدي لمصر .
معروف إن مصر أول دولة في التاريخ تكتشف الدهب وتحوله لصناعة متكاملة بداية من الاستكشاف من الجبال والمناجم إلى التنقية والصهر تشكيل المعدن ودا من أيام الفراعنة واستخدمته كمان كعملة في المعاملات التجارية وكان مصدر قوة لمصر على مدار آلاف السنين ودلوقتي الدهب زادت أهميته بشكل كبير جدا لأنه معدن نادر ولأنه بيدخل ضمن الاحتياطي النقدي للدول مع الدولار وبيعتبر عملة واحتياطيات الدول من الدهب واحد من تقييمات القوة الاقتصادية فيها.
ومن ساعة تولي الرئيس السيسي زمام الحكم وحاز قطاع المعادن والتعدين أهمية قصوى وفي المقدمة منه معدن الدهب للأسباب اللي قلنا عليها ومصر اعتمدت خطط واضحة لجذب الاستثمارات الأجنبية للتنقيب عن الدهب في أراضيها وطرحت آلاف الكيلومترات للتنقيب عنه وصلت حسب بيانات رسمية 56 الف كيلو متر مربع تشم 320 قطاعاً ضمن مزايدات طرحتها الحكومة على الشركات الأجنبية العالمية الكبرى وبتخطيط للوصول بحجم الاستثمارات المباشرة في قطاع استخراج الدهب إلى مليار دولار .
ولو هنتكلم بالارقام.. مصر بتنتج حوالي 16 طن دهب سنويا وبيجي أغلبه من منجم السكري في الصحراء الشرقية وهو أكبر منجم مكشوف للدهب في العالم بالإضافة إلى منجمي حمش وإيقات وفيه دلوقتي 56 شركة محلية شغالة بمجال التنقيب اليدوي عن الدهب في المناطق الخاضعة لإشراف شركة شلاتين للثروة المعدنية بالصحراء الشرقية ودا بخلاف الشركات العالمية ولو فاكرين فيه 11 شركة محلية وعالمية فازت في أول مزايدة طرحتها مصر للتنقيب عن الدهب، وتتوزع بواقع 4 شركات محلية، و7 شركات أجنبية والشركات دي فازت بالتنقيب في 82 قطاع بما يوازي 28 في المئة من القطاعات اللي كانت مطروحة في المزايدة.
طيب ايه الجديد في ملف الدهب وليه بنتكلم عنه النهاردة ؟
من ساعات شركة “شلاتين” ودي شركة حكومية أعلنت عن خطط جديدة للتحول إلى منتج للدهب والمعادن الثمينة، بدل من شراء المعدن الأصفر من الأفراد وبيعه للبنك المركزي والشركة حددت 3 مناطق بالصحراء الشرقية لبداية أعمال الاستكشاف خلال العام الجاري و استقرت الشركة على منطقتي “حنجيلة” و”أم عود” بالصحراء الشرقية ذات الإمكانيات الواعدة والاحتياطيات المميزة في الدهب ومنطقة تانية بوادي العلاقي وكمان قررت الشركة الاستعانة بخبراء عالميين في مجال البحث والاستكشاف لضمان نجاح عمليات التنقيب عن الدهب وإنتاجه بمرحلة لاحقة.
وفي نفس الوقت الشركة بتخطط لزيادة كميات الدهب المسلمة للبنك المركزي المصري بنسبة 25% خلال السنة الجاية وتستهدف”شلاتين تسليم المركزي 1.25 طن من الدهب بدرجة نقاء 99.9% بنهاية 2025 مقارنة بطن بنهاية العام الجاري.
طيب ايه تأثير إعلان شلاتين الأخير ا على الاحتياطي النقدي الاستراتيجي ؟
زي ما قلنا إن الدهب بيدخل كمكون أساسي في احتياطات النقد للدول ووصلت أرصدة الدهب المدرجة في صافي الاحتياطيات الدولية بمصر 10.644 مليارات دولار في ديسمبر 2024 ودا بيكشف لينا أهمية الدهب للدول ولما انتاج مصر يزيد من الدهب من خلال شركات مصرية اكيد دا هينعكس على احتياطيات الدولة من النقد الأجنبي واللي بيعتبر عامل قوة وأمان للاقتصاد المصري كله ودا غير أن كل الاكتشافات الجديدة والمنتظرة هتحول مصر لمركز عالمي في إنتاج الدهب مع المؤشرات الواعدة في مناطق الاستكشاف.